بەیاننامەی یەکیەتیی ژنانی دێموکراتی کوردستانی ئێران بە بۆنەی دەستپێکی سەری ساڵی نوێی کوردی

بەیاننامەی یەکیەتیی ژنانی دێموکراتی کوردستانی ئێران بە بۆنەی دەستپێکی سەری ساڵی نوێی کوردی

 

هاونیشتمانیانی خۆڕاگر

ژنانی ئازای وڵات

 

ئەمساڵ ساڵێک بوو کە هەموومان شاهیدی هەستانی شەپۆلی خوێنی ڕۆلە ئازاکانمان لە شەقامەکانی رۆژهەڵات بە دەستی جەلادی سەردەم بووین.

 

بەو هیوا بووین لە ئاگری بەتینی نەورۆزدا، جامانەی کوردایەتی بکەینە چۆپی و بەهەر سەمایەک لەدەوری ئاگردا بە خوێنمژانی تاران بلێنن، ئێمە هەزارانین و هەر هەزاران دەمێنینەوە.

 

بەداخەوە بڵاوبوونەوەی پەتای کۆڤید١٩ ناچارمان دەکات جیاواز لە ساڵانی ڕابردوو بۆ پاراستنی نیشتمان ئەمجارە لە ماڵەکانماندا بمێنینەوە.

 

نەورۆز لای کورد هێمای خۆڕاگری، نوێ بوونەوە ڕابوونە، دوای هەزاران ساڵ زەخت و زەبری داگیرکەر، هیچ دوژمنێک نەیتوانیوە نەورۆزمان لا بسڕێتەوە، بێ گوومان هیچ پەتایەکیش ناتوانێ نەورۆزمان لێ بستێنێتەوە، بەڵام ئەوەی ڕوونە سەڵماندنی یەکبوونمانە بۆ مانەوە و هەرمان.

 

یەکیەتیی ژنانی دێموکراتی کوردستانی ئێران وێڕای پیرۆزبایی سەری ساڵ و ئاواتی سڵامەتی بۆ هەمووان، داواکارە ئەمساڵ بۆ پاراستنی گیانی خۆمان، ئازیزانمان، پزیشکان و پارێزەرانی ژیان لە کوردستان، لە ماڵەکانماندا بمێنینەوە و لە کۆبوونەوە بە کۆمەڵەکان خۆمان بپارێزین.

 

فەلسەفەی نەورۆز یەکبوون و سەرکەوتنە، بە هیوای ئەوەی ئەمساڵ پێکەوە، هەموومان بەسەر ڤایرۆسی کۆڕۆنادا سەرکەوین.

 

ساڵی نوێی ٢٧٢٠ی کوردی لە هەموو کوردێک بە تایبەتی بنەماڵەی شەهیدان، بەندکراوانی سیاسی، پێشمەرگەکانی سەنگەری بەرخۆدان لە چیاسەرکەشەکانی کوردستان و هەموو تێکۆشەرانی رێگای ئازادی پیرۆز بێت.

 

هیواخوازین ساڵی نوێ دەستپێکی وەدیهاتنی هەموو مافە ڕەواکانی گەلی کورد و دابین بوونی یەکسانی و دادپەروەری بۆ ژنانی چەوساوەی گەلەکەمان بێت.

 

یەکیەتیی ژنانی دێموکراتی کوردستانی ئێران

چوارشەممە ٢٨ی ڕەشەمەی ٢٧١٩ی کوردی