ڕاگەیەندراوی "ناوەندی ژنانی کوردستانی رۆژهەڵات" بە بۆنەی ٨ی مارس ڕۆژی جیهانی ژن

ڕاگەیەندراوی "ناوەندی ژنانی کوردستانی رۆژهەڵات" بە بۆنەی ٨ی مارس ڕۆژی جیهانی ژن

 

هەشتی مارس تا ئێستا بۆ ئێمە ژنانی کورد وەبیرهێنەرەوەی شادی و ئازادی نەبووە، ئەم ڕۆژە جارێکی دیکە وەبیرمان دێنێتەوە چەندە لەم ڕێبازە، داری ئاواتی یەکسانی‌ خوازی و مرۆڤ‌ تەوەریمان بە خوێن و ئازاری سەدان کچ و ژنی وڵاتەکەمان تا ئێستاش ئاو دەدرێ و ئێمە دڵ پڕ لە هیوا لە ئاسۆیی ڕوون دەڕوانین.

 

هاونیشتمانیانی خۆڕاگر !

 

ئەمساڵ لە حاڵێکدا دەمانهەوێ یادی رۆژی جیهانی ژنان، ٨ی مارس بەرزڕابگرین کە شەقامەکانی کوردستان و ئێران، خوێنیان لێ دەچۆڕێ و سەدان کوڕ وکچی گەنجی خەزەڵوەر لە بەندیخانەکانی خوێنمژان لە ژێر ئەشکەنجەدان و بەشێکیان تا ئێستاش بێ سەروشوێنن. دەیان پەپووڵەی کوردستانمان بە هۆی سەرەڕۆییەکانی جەلادانی تاران لە یەک ساتدا لە ئاسمانی ڕەشی تاران و لە بەرەبەیانیەکدا لە شەقەی باڵیان داو تا ئێستاش رژیمی ئێران، پاساو بۆ ئەو جەنایەتەی دێنێتەوە و وڵامدەر نیە!!

 

لە بەرەبەرەی مانگی ڕەشەممە، مانگی گوڵەگەزیزە و وەنەوشە، ژنان سەڕەڕای هەموو ئەو ئازارانەی تەنیا لە ماوەی چەند مانگدا بە سەر خەڵکی ڕۆژهەڵاتدا سەپێندرا، ئێستاش هەر بە بۆنەی سەرەڕۆیی ئەو ڕژێمەوە، هاونیشتمانیانمان لەگەڵ پەتا و دڵەڕاوکێی تووشبوون بە نەخۆشی کۆڤیدی ١٩ بەڕەوڕوون، خەسارەکانی دوای بوومەلەرزە، سێڵاو و وشکەساڵی و … بەشێک لە ئازارە بەردەوامەکانی گەلی کوردن کە بە شێوەی سیستماتیک و لە سەدەی ٢١دا، بە سەرماندا دەسەپێندرێن. ئێران بە مانای تەواوی وشە، ئەشکەنجەگای مرۆڤەکانە، لە سەرووی هەموو هاووڵاتیان، ژنان و منداڵان یەکەم و بێ‌ دەرەتانترین قوربانیەکانی دەسەڵاتی نگریس و چڵ ساڵەی ئەم ڕژیمەن.

 

٨ی مارسی ئەمساڵ لە بارودۆخێکی هەستیاردا بەرزڕادەگرین، بڵاوبوونەوەی نەخۆشی کۆڤیدی ١٩ و ڤایرۆسی کۆڕۆنا، بووەتە هۆی دروستبوونی دڵەڕاوکێ و کاروباری رۆژانەی خەڵکی بە تەواوەتی خستووەتە ژێر کاریگەری نێگەتیڤ، هەر بەم بۆنەوە دەرفەتی کۆبوونەوە و ناڕەزایەتی دەربڕینی بە کۆمەڵمان بۆ ناڕەخسێت، بەڵام داوامان لە هەموو یەکسانیخوازان و خەباتکاران ئەوەیە هەر لە ماڵەکانی خۆیانەوە بە داهێنانێکی بچوکیش بووە، یادی ئەم ڕۆژە مەزنە بەرز ڕابگرن و بیسەلمێنین ئێمە لە هەر بارۆدۆخێکدا دەست‌هەڵگری مافە ڕەواکانی خۆمان نابین و بە تایبەت لە ڕۆژی ٨ی مارس ڕێز لە خەبات و تێکۆشانی پڕ لەسەروەری ژنان دەگرین.

 

 

سەڕەڕایی جیاوازی و تایبەتی باروودۆخی ئەمساڵی ٨ی مارس کە هەمووان بۆ خۆپاراستن لە پەتای کۆرۆنا، ناچارین خۆمان لە دابڕگەدا بھێڵینەوە، وەکوو هەمیشە چۆن ژنان دەسپێشخەر و بەشداری هەر خەباتێکی مەدەنی بوون، خۆپاراستن و وشیارکردنی هاونیشتمانیان لە ڕوبەڕوبوونەوە لەگەڵ ڤایرۆسی کۆرۆنا بکەینە ڕێگایەکی خەباتکارانە و هەموو چینەکانی کۆمەڵگا هان بدەین بۆ شکست هێنان بە هەوڵێکی دیکەی ڕژیمی ئێران لە ڕاستای سڕینەی گەلی کورد، لە ماڵەکانیان نەچنە دەرەوە و پەیوەست بە کەمپەینی چالاکانی مەدەنی بۆ خۆپاراستن و هێلینی خۆشەویستانمان بین.

 

خەباتکاران و یەکسانیخوازانی گەلی کورد

 

بە لەبەرچاوگرتنی بارودۆخی ژنانی کورد و هەروەها مێژووی پڕشنگداری خەباتی ژنی کورد کە تا ئێستا سەرەڕایی هەبوونی هەزاران کەند و کۆسپ، دەستبەرداری تێکۆشانی لە پرسەکانی خۆی و نەتەوەکەی نابێت، دەسەلمێت کە هەنتەشی ژنی کورد لە بارودۆخی ناوچەیی و جیهانیدا لە هەموو ئاڵۆگۆرەکان کاریگەرە و دەبێت لە خوڵقانیشیاندا بەشدار بێت.

 

ئێمە دەبێت لە جاران سوورتر و بە یەکگرتوویەکی پتەوتر، بێینە مەیدان و پێداگرتر بین لە ڕۆڵ و ڕەوایی خەباتمان و وەکوو هەمیشە لە هەر هەل و مەرجێکدا کە بۆمان دەڕەخسێت نوێنەرانی ڕاستەقینەی خەباتی دژ بە پیاو سالاری و تاکڕەوانەی ژنانی کورد بین و ناوەندی ژنانی کوردستانی ڕۆژهەڵاتیش وەکوو نوێنەری ژنانی ڕۆژهەڵات بەردەوام هەوڵی بۆ جێبەجێ کردنی ئەم ئەرکە داوە و دەدات.

 

وەرن با هەموو ژنان، شان بە شانی یەک، واز لە کۆت و زنجیری کۆیلایەتی بێنین و بەرگی ژێردەستە بوون، فرێ بدەین و بە هەموو هەوڵمانەوە بۆ نەوەی دوا ڕۆژ، بۆ پاشەڕۆژێکی گەش، بۆ کۆمەڵگایەک بە بێ ژن کوشتن، بە بێ خۆکوشتن و دوور لە توندوتیژی، هاواری سکاڵامان تێکەڵ بە یەکدی بکەین و یەکڕەنگ و یەکدەست لە ژێر ئاڵای یەکسانیخوازیدا، هێز و وزەمان کاناڵیزە بکەین.

 

سەنگەری خەباتمان هەر ئاوەدان...

 

ناوەندی ژنانی کوردستانی رۆژهەڵات

٧ی مارسی ٢٠٢٠ زایینی

١٧ی رەشەممەی ١٣٩٨ هەتاوی

 

رێکخراوەکانی  سەر بەناوەندی ژنانی رۆژهەڵات :

یەکیەتیی ژنانی دیموکراتی کوردستانی ئێران

یەکیەتیی ژنانی دیموکراتی کوردستان

کۆمەڵەی ژنانی رۆژهەڵات

ئاسۆی ژنی کورد

رێکخراوی ئافرەتانی خەباتی کوردستانی ئێران