پەیامی یەکیەتی ژنان لە سی هەمین ساڵیادی تێرۆری دوکتوور قاسملوو لە شاری بروکسێل

پەیامی یەکیەتی ژنان لە سی هەمین ساڵیادی تێرۆری دوکتوور قاسملوو لە شاری بروکسێل

بەشدارانی هێژا 
 

ئەمرۆ٣٠ ساڵ تێدەپەڕێت بەسەر پیلانی بەناو وتووێژی رێژیمی تیرۆریست پەروەری ئیسلامی ئێران کە بووە  هۆی تیرۆی رێبەری ناوداری نەتەوەەمان شەهید دکتۆر عەبدولرەحمانی قاسملوو و هاوڕێیانی، لە رۆژێکی وەکوو ئەمڕۆدا کە کورد بە هیوای بەدەست هێنانی مافەکانی لەسەر مێزی وتووێژ ، و کۆماری ئیسلامیش بە هیوای لە ناوبردنی بزوتنەوەی کورد لە سەر مێزەکە کۆ بوونەوە ، بەداخەوە هەرچۆن رێژیمی تیرۆریستی ئێران پیلانی بۆ دانابوو لەسەر مێزی گفتوگۆ لە کردەوەیەکی تیرۆریستیدا دکتۆر قاسملووی ڕێبەر و هاوڕێیانیان شەهید کرد مێژووی رەشی رێژیمی ئێرانیان تاریکتر نیشانی خەڵکی دونیا و کوردستان دا ، شەهید کردنی  د. قاسملوو بووە ئەزموونێکی  تاڵ لەمەڕ گفتووگۆ کردن لە گەڵ رێژیمی کۆنەپەرەستیدا و ئەو راستیەیان بە بیر گەلی کورد خستەوە کە هەردەم دووژمن گفتووگۆ و وتووێژی بۆ دووبارە خۆسازدانەوە و زەربەلێدان بە بزووتنەوەی رزگاری خوازی گەلی کورد بەکارهێناوە .
 

رێبەری شەهید کەسێکی  راستگۆ لە سیاسەت و لە خۆبردوو لە خەباتدا بووە و هەردەم هەوڵی بۆ پێگەیاندن و پەوروەردەی هەرچی لاوی زیاتر لە ریزەی خەباتدا بووە، خوێندکارێکی سەرکەوتوو و بەتوانا بووە و ژنانی وەکوو باڵی تەواوکەری  خەبات لە دژی کۆنەپەرەستی و داگیرکەردا زانیوە.  ئاستی دانایی د. قاسملوو رێژیمی بە چۆکداهێناوە و لە بەرانبەر بیرۆکەی ئەودا رێژیم ناچاربووە پەنا بۆ گولە ببات و بە داخەوە، رێبەری ناوازەی کوردیان  لە کاتێکی هەستیاردا شەهید کرد !
 

بەشدارانی هێژا

یەکیەتی  ژنانی دێموکراتی  ئێران وەک بەشێک لە ڕێبازی فیکری ڕێبەری لە دەستچوومان ، وەفادارە بەو ڕێبازە و تا گەیشتن بە ئامانجە نەتەوەیی و بەرابەریی ژن و پیاو لە نێۆمەڵگای کوردستان درێژە بە خەبات  دەدا و ئیلهام لە بیری سەردەمیانە و پێشکەوتووانەی دکتۆر  قاسملووی مەزن وەردەگرێ. ڕێبەری زانامان هەتا لە ژیان دا بوو ڕێنوێن و هاوکار و پشت و پەنای یەکیەتی  ژنان و خەمخۆر ی جێگریی کردنی یەکسانی  ژن  و پیاو لە نێو ڕێزەکانی حێزب و کۆمەڵگەی ڕۆژهەڵات بوو. 
بۆیە ئێمە  وەک یەکیەتی ژنانی دێموکرات خۆمان بە قەرزداری پشتیوانییەکانی ئەو ڕێبەرە بلیمەت و بە بیروکردەوە دێموکراتە  دەزانین و لە  چوارچێوەی بیری بەرینی ئەو دا بەرەو ئاسۆی سەرکەوتن هەنگاو دەنێین.
 

لە کۆتاییدا  ڕوو دەکەینە کۆمەڵگای نێونەتەوەیی و یەکیەتی ئۆڕووپا بەتایبەتی کە گوشار بخەنە سەر دەوڵەتی ئۆتریش تا دۆسیەی بە ناحەق داخراو و قوربانیی سات و سەودای ئابووری بکەوێتەوە کار و ڕاستی و دروستیی ئەو جینایەتە لە جەرگەی ئۆرووپا دا بخرێتە ڕوو. 
گەلی کورد قوربانی تێرۆریزمی کۆماری ئیسلامی بوو ، ئەو تێرۆرەش لەی وڵاتێکی ئەندامی یەکیەتی  ئۆرووپا دا ئەنجام دراوە ، کە وایە  داواتان لێدەەین چیدیکە ئەو دۆسیەیە پشتگوێ نەخرێ.
 

سڵاو لە یاد و ناوی ڕێبەری شەهید دکتۆر قاسملوو و هاوڕێ عەبدولا قادری ئازەر

ڕووڕەشی بۆ کۆماری  تێرۆریستی ئیسلامیی ئێران

یەکیەتی  ژنانی دێموکراتی کوردستانی ئێران لە دەرەوەی وڵات