پەیامی کومیتەی هاوئاهەنگی رێکخراوە دێموکراتیکەکانی کوردستانی ئێران

پەیامی کومیتەی هاوئاهەنگی رێکخراوە دێموکراتیکەکانی کوردستانی ئێران

کوردستانیانی ئازیز

 رێبوارانی رێگای ئاشتی و ئازادی

سی سال بەسەر تیرۆر کردنی رێبەری بلیمەت و مافخوازی گەلەکەماندا تێدەپەرێ،رێبەرێک کە هەموو ژیانی خۆی لە کوردستان و هەندەران تەرخان کرد بۆ یەک مەبەست،  گەیاندنی نەتەوەکەی بە داخوازییە لەمێژینەکانی واتا ئازادی و یەکسانی.
قاسملوو ئەو مامۆستا مەزنە بوو کە قوتابخانەکەی بە هەزاران قووتابی دەروەستی نیشتمان، شوێنکەوتو و پێگەێشتووی  مەکتەبەکەین  و تا هەنووکەش  بەردەوام فێرخوازی ئەم قوتابخانەیە هەر دێتوو ڕێژەیان زیاتر دەبێ.

کە هزری  دێموکرات دەبێتە بیری قاسملوو ،بیری قاسملوو دەبێتە هزری زۆرینەی نەتەوەیەک لە نیشتمانێکی داگیرکراو، بیر و هزرێک کە قاسملوو  لە پێناوی دا  بوێرانە خەباتی کردوو بوو بە رەمزێک کە  دوای سی ساڵ لە شەهید بوونی دەبینین هەر دێتوو باڵا دەکات و دەبێتە  مەکتەبێک بۆ ئازادیخوازان.

قاسملووی رێبەر فێری کردین و سەلماندی کە خەبات بۆ ئازادی و یەکسانی قەتیس نابێتەوە لە جۆگرافیایەکی دیاریکراودا وخەبات سنوورەکان دەبەزێنێ .مامۆستامان بۆ گەیاندنی دەنگی مافخوازی نەتەوەکەمان لە کوردستان و هەندەران ساتێک وچانی نەدا و لە هەموو دەرگایەکی دا بۆ ئەوەی جیهان ئاگادار بکاتەوە کە نەتەوەیەکی حەقخواز زووڵمی لێدەکرێ و دەچەوسێتەوە ، قاسملوو ببوو بە  خەمخۆری نەتەوەیەکی بێ دەرەتان  لە ناو  کایەی   سیاسی زڵهێزانی جیهاندا، ئەو زڵهێزانەی ئامادە بوون  لە پێناو بەرژەوەندی پەردەپۆشی هەموو تاوانێک بکەن.

بەڵام رێبوارانی رێبازی قاسملوو وانەی خەباتی بێ سنوور و بەردەوامیان لە مامۆستا فێر بوون و دیتمان کە  دەرگای ئەو شارانەی   مامۆستای خەمخۆرمان  دەیکووتان،قوتابیانی ئێستا شەقامەکانی دەهەژێنن و بانگی دادپەروەری و عەداڵەت بە گوێیاندا دەدەن.

ئەو کاتەی تیرۆریستانی کۆماری ئیسلامی لەسەر مێزی وتووێژ جەستەی قاسملوویان شەهیدکرد،پێیان وابوو کە خەبات کۆستی دەکەوێ و دادەمرکێ نەیانزانی کە زیندوویەتی لە پەیامدایە نەک  جەستە.

لە ئێستاش دا دەبینن دوای تێپەربوونی سێ دەیە لە لەدەستدانی رێبەرمان  خەبات بۆ گەیشتن بە ئامانج هەر دێتوو بەربڵاوترو گەرم تر دەبێ، و کۆمەڵگای ئەمرۆی کوردستان و تاکەکانی بەرەو ئەو ئامادەبوونە هەنگاو دەنێن کە فەرهەنگی خەباتکردن ببێتە بە بەشێک لە ژیانی رۆژانەیان.

خەبات و لەخۆبردوویی قاسملووی رێبەر  و سەرجەم شەهیدان، ئەو وانەیان فێری نەسلەکانی دوای خۆیان کرد کە سەربەخۆیی بێ فیداکاری ئەبەد سەرناگرێ، ئەویە کە ئەمرۆ شاهیدی پەیوەست بوونی پۆل پۆل  کچان و کورانی هەڵوەدای ئازدین بە ریزەکانی خەبات، ئەمەش سەلمێنەری ئەوراستییە کە قاسملوو لە رێبازیدا زیندووە.

بە هێوای  رۆژێک کە بکەرانی ئەم کردەوە ناجوامێرانەیە بە سزای کردەوەکەیان بگەن و نەتەوەکەمان بە ئامانجی پر سەروەری شەهیدانمان  بگات.

رێباز و بیری قاسملوو بەردەوام

سەرکەوێ خەباتی نەتەوەیی دێموکراتی کوردستانی ئیران
پووشپەری١٣٩٨